शिक्षण, स्वच्छता आणि शाश्वत जीवनशैली - हीच आधुनिक गावाची ओळख!

स्मार्ट ग्राम झोळंबेतील महत्त्वाचे विकास उपक्रम

आरोग्य सेवा

ग्रामीण आरोग्य केंद्रात सुधारित सुविधा उपलब्ध

झोळंबे ग्रामपंचायतीची श्रमदानातून स्वच्छता मोहीम : ग्रामस्थांचा उत्स्फूर्त सहभाग

झोळंबे, दोडामार्ग, ४ जून २०२६ – पर्यावरण संरक्षण आणि स्वच्छतेप्रती जागरूकता निर्माण करण्याच्या उद्देशाने झोळंबे ग्रामपंचायतीने श्रमदानाच्या माध्यमातून भव्य परिसर स्वच्छता मोहीम आज दि. ४जुन रोजी राबवली. या मोहिमेचे नियोजन आणि अंमलबजावणी ग्रामपंचायतच्या पुढाकाराने करण्यात आली.

लोकप्रतिनिधींसह अधिकारी-कर्मचारी मैदानात या स्वच्छता मोहिमेत केवळ ग्रामस्थच नव्हे तर लोकप्रतिनिधी आणि शासकीय अधिकारी-कर्मचारीही सहभागी झाले होते. दोडामार्ग तालुका उपसभापती गणेशप्रसाद गवस, सरपंच विशाखा नाईक, उपसरपंच विनायक गाडगीळ, सदस्य सुभाष गवस, सौ. संजना गवस, सौ. विनीता गवस यांनी स्वतः हात झाडू, पिवळ्या कचरा पिशव्या घेऊन रस्ते आणि सार्वजनिक जागा स्वच्छ केल्या.

ग्रामसेवक नामदेव परब, आरोग्य अधिकारी सौ. निकीता नाईक यांच्या मार्गदर्शनाखाली आरोग्य आणि स्वच्छता यांचा समन्वय साधण्यात आला. सौ. रेखा गवस, शिवराम गवस, ओंकार गवस, सखाराम गवस, प्रभाकर गवस, सुरेश गवस, सतेज गवस, अमोल गवस, जानु कोकरे कर्मचारी बाबली गवस यांच्यासह शेकडो ग्रामस्थांनी या श्रमदानात हातभार लावला. महिला बचत गटातील महिलांनीही मोठ्या संख्येने सहभाग नोंदवत गावाच्या स्वच्छतेसाठी पुढाकार घेतला.

कचरा विल्हेवाटीसह जनजागृती

मोहिमेअंतर्गत ग्रामपंचायत कार्यालय परिसर, मुख्य रस्ते, सार्वजनिक विहिरी, मंदिर परिसर आणि शाळेभोवतीचा परिसर स्वच्छ करण्यात आला. रस्त्याकडेला आणि ओढ्याजवळ टाकलेला प्लास्टिक, काच, इतर कचरा गोळा करून तो वेगळा करण्यात आला. ओला-सुका कचरा वर्गीकरणाबतही ग्रामस्थांना मार्गदर्शन करण्यात आले. मोहिमेत “एकच ध्यास - स्वच्छ झोळंबे गावास” असा फलक लावण्यात आला होता. सर्व सहभागींनी एकत्र येऊन स्वच्छतेची शपथ घेतली.

मोहिमेनंतर बोलताना तालुका उपसभापती गणेशप्रसाद गवस म्हणाले, “सरकारच्या स्वच्छ भारत अभियानाला गती देण्यासाठी झोळंबे ग्रामपंचायत कायमच अग्रेसर राहिली आहे. आजचा श्रमदानाचा उपक्रम ही फक्त एक दिवसाची मोहीम नाही, तर आपण सर्वांनी स्वच्छता ही आपली सवय बनवली पाहिजे.”

सरपंच विशाखा नाईक यांनी महिलांना आवाहन करताना सांगितले की, “घराची स्वच्छता ही महिलांच्या हात असते. त्याचप्रमाणे गावाची स्वच्छताही आपण सर्व मिळून करू शकतो. ग्रामपंचायत यासाठी आवश्यक ती सर्व मदत करेल.”

मोहीमेच्या यशाबद्दल बोलताना उपसरपंच विनायक गाडगीळ यांनी सांगितले, “लोकसहभागाशिवाय कोणतीही मोहीम यशस्वी होत नाही. आज झोळंबेकरांनी ती सिद्ध करून दाखवली आहे. यापुढे दर महिन्याला एक दिवस श्रमदानाचा ठेवण्याचा आमचा मानस आहे. उपसरपंच विनायक गाडगीळ यांनी सर्व ग्रामस्थांचे आभार मानत, गावाला आदर्श स्वच्छ गाव बनवण्यासाठी एकजुटीने काम करण्याचे आवाहन केले.”

झोळंबे ग्रामपंचायतीच्या या उपक्रमाचे तालुकाभरातून कौतुक होत असून, इतर गावांसाठीही तो आदर्श ठरत आहे.